Posted by narodski on January 30th 2008 to
Sports Tayong mga Pinoy ay wala nang pag-asang tumangkad. Tanggapin na natin ito. Kaya kahit pa alam natin kung gaano kagaling si Johnny Abarrientos at Alvin Patrimonio sa basketball, 5′10 lang (yata) si "The Flying A" at 6′3" lang si "The Captain", sadyang napakaliit kung ihahambing natin sa mga player ng China. Kaya naman lagi tayong olats kapag mga international tournament na ang sinasalihan natin (maliban lang sa SEA Games,at least may pampalubag-loob pa tayo). Wag kayong magalit, mahilig ako sa basketball, at minsan ko ring pinangarap na balang araw makapaglaro sa PBA. Pero gumuho ang lahat ng aking mga pangarap ng hindi ako umabot ng 6 feet (hanggang 5′9" lang inabot ko). Ngayon palaru-laro na lang ako tuwing nagkakayayaan ng tropa, o kaya naman nagmimiron na lang paghindi makapaglaro dahil madaming mga buwaya at buwakaw sa court.
Sa tingin ko dapat na nating umpisahang maghanap ng ibang sport na kahihiligan nating mga Pinoy. Pero siguradong hindi madaling gawin yun dahil dominado ng basketball, sa pangunguna ng PBA, ang local sports scene. Dapat mag-umpisa ito sa grassroots level. Alam kong inuulit ko lang ang mga dati nang sinasabi ng ibang mga tao, pero bakit parang walang nangyayari? Ibig sabihin meron silang maling ginagawa.
Una, dapat isipin natin kung anong sport nababagay ang Pinoy. Obviously, dapat yung sport ay hindi kailangan ng tanggkad. Pasok na dito ang baseball at soccer/football. Saktong-sakto sa body type natin ang dalawang yun, hindi requirement ang height.
Pero kung tatanungin ako kung ano ang mas posibleng pumatok sa dalawang iyon, pipiliin ko ang football. Mas matipid kasing laruin, sapatos at bola pwede na. Sa baseball, kelangan mo pa ng bat, gloves, at yung baseball para makapaglaro. E hindi naman lahat kayang makabili ng equipment. so iboboto ko ang football.
Pangalawa, kung sino man ang may balak na pausuhin ang football, huwag na silang mag-umpisa sa Maynila. Masyadong saturated na ang sports scene dito. Tapos madalang lang ang mga field na pwedeng paglaruan. Dapat mag-umpisa sa mga probinsya. Ang hirap naman kasi sa mga nag-oorganize ng mga liga dito sa atin, gusto pera agad. Kaya tumaob yung MBA dati kahit maganda sana yung konsepto nila kasi sobrang laki ng pasweldo. Ayun, naubos ang pera ng mga teams at di na napaswelduhan ang mga player.
Dapat paunti-unti lang. Pwedeng sa Visayas muna o sa Mindanao habang nag-iipon ng revenues ang liga (Actually, feeling ko ang kalalabasan ng ideya ko ay hindi nalalayo sa mga professional football leagues sa Europe). Magbuild-up muna ng fanbase sa bawat area/region. Magtayo sila ng local clubs sa bawat major city or area. Give the local people something to root for, para kapag may match, say Cebu vs. Davao, siguradong may manonood. Para sa pondo ng team, pwede silang kumuha ng sponsors tapos yung mga sponsor yung nakalagay sa tshirt ng teams, pero hindi sila yung may-ari ng team, hindi kapareho ng PBA. Magfocus sila sa ticket sales. At para sa TV coverage, gamitin nila yung mga local na TV stations. Kahit hindi muna national TV. Sigurado rin namang yung local press at icocover din yung mga laro nila. At least pati yung mga dyaryo may dagdag na maisusulat.
Ang mga nagsasabi lang naman na boring ang football ay yung mga hindi pa nakakalaro nito. Palibhasa mababa ang scoring akala nila walang aksyon sa laro. Idagdag mo pa na parating natatambakan ang national team nating kahit sa SEA games lang–meron yata akong napanood, 10-0 talo tayo– e sino nga naman ba ang magkakainteres na manood nito kung ang nakasanayan mong panoorin ay basketball?
Nung nasa probinsya ako (sa Northern Samar), magkapantay lang halos ang kasikatan ng football. Dati regular din ang liga duon, at palagay ko hanggang ngayon ganun pa rin. E pano na lang kung magkaroon ng Samar vs. Ilocos na match? Waray vs. Ilocano. O kaya Cebu/Davao vs. Laguna? Bisaya vs. Tagalog. Kung maayos lang ang marketing at affordable ang tickets, sa tingin ko hindi magdadalawang isip na manood ang mga tao ng laro. At kapag nahilig na ang mga tao sa panonood, sigurado yan na gugustuhin na nilang maglaro din, kahit katuwaan lang. At kapag marami na ang naglalaro at nahihilig dito, magkakaroon na rin ng interes ang mga tao na manood ng high quality na laro, gaya ng FIFA World Cup. At syempre gugustuhin na rin nila, lalo na yung mga bata, na gayahin yung mga player na makikita nila.
Mangyari kaya? Sa tingin ko pwede, kung gugustuhin. Ika nga, pag gusto maraming paraan, pag ayaw maraming dahilan.
1 Comment